تاجیکستان ۲۰ هزار نیروی پشتیبانی در مرز افغانستان مستقر می‌کند
رئيس جمهوری تاجیکستان اعلام کرد ۲۰ هزار سرباز ارتش این کشور را به‌منظور تقویت امنیت نواحی مرزی با افغانستان بسیج کرده است.
این در حالی است که ۱۰۳۷ سرباز ارتش افغانستان اخیرا در پی پیشرفت طالبان در این مناطق به درون خاک تاجیکستان گریختند.
امام‌علی رحمانف، رئیس جمهوری تاجیکستان از شماری از رهبران جهان از جمله ولادیمیر پوتین، رئیس جمهوری روسیه و محمد اشرف‌غنی، رئيس جمهوری افغانستان خواسته است تا درباره‌ی این مسئله گفتگو کنند. وی همچنین از همسایگانش ازبکستان و قزاقستان نیز تقاضای کمک کرده است.
از این میان، روسیه طی بیانیه‌ای رسمی وعده داده است در صورت نیاز، برای تأمین امنیت مرزی به تاجیکستان کمک خواهد کرد.
در هفته‌های اخیر، و در پی خروج نیروهای ایالات متحده و هم‌پیمانانش از افغانستان شبه‌نظامیان طالبان شماری از نقاط این کشور را به‌تصرف درآورده‌اند. آنان از جمله کنترل ۶ ولسوالی ولایت بدخشان در شمال افغانستان را به دست گرفته‌اند که با تاجیکستان و چین هم‌مرز است.
پیش از این و طی چند هفته گذشته نیز صدها سرباز ارتش افغانستان برای فرار از نبردهای مرگبار با نیروهای طالبان از مرز عبور کرده بودند و به تاجیکستان پناه برده بودند. این کشور تا کنون با رعایت اصل «حُسن همجواری» مانع ورود سربازان افغان به خاک خود نشده است.
